عید میلادالنبی صلی اللہ علیہ وسلم کا پر نور دن آنے والا ہے اس کی مہکتی ٹھنڈی ہوا کے جھونکے آرہے ہیں گھروں اور گلیوں میں سجاوٹ اور چراغاں شروع ہو چکا ہے عشاقان رسول کے دلوں سے صدائیں اٹھ رہی ہیں۔
لب پر نعت پاک کا نغمہ کل بھی تھا اور آج بھی ہے
میرے نبی سے میرا رشتہ کل بھی تھا اور آج بھی ہے
یہ غلامی رسول کا رشتہ ہے اللہ تعالی ہمارا ایمان سلامت رکھے ایمان کی جان رحمت عالمیان صلی اللہ علیہ وسلم اور ان سے نسبت رکھنے والی ہر شے سے ہماری محبت میں مزید اضافہ فرمائے ایسا اضافہ کہ ایمان کی مٹھاس نصیب ہو رسول اکرم صلی اللہ تعالی علیہ وسلم کی تعظیم و محبت کے آثار ہمارے اعمال سے ایسے ظاہر ہوں کہ دل جگمگا اٹھے چہرے پر نور ہوں عبادت پر استقامت اور تقوی کی دولت میسر آئے واللہ العظیم بارہویں کے چاند میرے آقا و مولی صلی اللہ علیہ وسلم کے چمکتے چہرہ کی مبارک کرنوں میں سے اک کرن ظاہر و باطن پر پڑ جائے تو بیڑا پار ہے ، ان کی محبت کا ایک آنسو چھلک جائے تو مغفرت کی امید اور قوی قوی قوی ہو جائے دل میں سچی محبت سچی تعظیم پر استقامت مل جائے بارہ ربیع الاول شریف کی بارش نور میں ایسا غسل ہو کہ سب گناه ظلمتیں کدورتیں دل کی قساوتیں دھل جائیں تیاری کیجئے روز کچھ نہ کچھ نعت خوانی کیجئے نعتوں کے ہو سکے تو اشعار ضرور یاد کیجئے صبح و شام ان کی تکرار کیجئے اپنے بچوں کو چند نعتیں یاد کرائیں اور ان سے سنیں گھروں میں نعتوں کی آواز کیا گونجے گی دل میں عشق رسول کے چراغ روشن ہونگے اندھیری قبر کی روشنی کا خوب اہتمام ہو گا۔