Cockroach Ya Khatmal Kapron Par Mar Jayen Tu Kya Hukum Hai ?

کاکروچ یاکھٹمل کپڑوں میں مرجائے توکیاحکم ہے ؟

مجیب: ابوالفیضان عرفان احمد مدنی

دارالافتاء اہلسنت

(دعوت اسلامی)

سوال

   مسئلہ پوچھنا ہے کہ رات میں نے مشین میں کپڑے دھوئے تھے ، سب سے آخر میں دیکھا کہ ایک کپڑے میں مرا ہوا کاکروچ یا  کھٹمل تھا ، سوال یہ ہے کہ سب کپڑے پاک ہیں یا ناپاک؟

بِسْمِ اللہِ الرَّحْمٰنِ الرَّحِیْمِ

اَلْجَوَابُ بِعَوْنِ الْمَلِکِ الْوَھَّابِ اَللّٰھُمَّ ھِدَایَۃَ الْحَقِّ وَالصَّوَابِ

      فقہائے کرام کی تصریحات کے مطابق جن جانوروں میں بہتاخون نہیں ہوتا، وہ جانور پانی یا کسی اور چیز میں گر جائیں یا گر کرمرجائیں تو وہ  پانی یاوہ چیز ناپاک نہیں ہوتی،اورکاکروچ وکھٹمل میں بہتاخون نہیں ہوتا، لہٰذا پوچھی گئی صورت میں کاکروچ یا کھٹمل واشنگ مشین میں گرنے یا کپڑوں کے ساتھ دھلنے سے کپڑے ناپاک نہیں ہوں گے ۔

   جن جانوروں میں بہتاخون نہیں ہوتا ، ان کے مرنے سے پانی ناپاک نہیں ہوتا جیسا کہ فتاوٰی عالمگیری، بدائع الصنائع وغیرہ میں مذکور ہے : ” والنظم للاول“ موت ما ليس له نفس سائلة في الماء لا ينجسه كالبق والذباب والزنابير والعقارب ونحوها“یعنی پانی اس جاندار کی موت سے نجس نہیں ہوتا  ،جس میں بہتا خون نہ ہو، جیسے کھٹمل، مکھی، بھڑ اور بچھو وغیرہ۔“                   (فتاوٰی عالمگیری، کتاب الطھارۃ، ج 01، ص 24،مطبوعہ: کوئٹہ)

وَاللہُ اَعْلَمُ عَزَّوَجَلَّ وَرَسُوْلُہ اَعْلَم صَلَّی اللّٰہُ تَعَالٰی عَلَیْہِ وَاٰلِہٖ وَسَلَّم