Kya Aisi Hadees Hai Ke Shaitan Ne Zameen Ki Har Jagah Sajda Kiya?

کیا کوئی ایسی حدیث ہے کہ شیطان نے زمین کی ہر جگہ سجدہ کیا تھا ؟

دارالافتاء اہلسنت

(دعوت اسلامی)

سوال

   کیا فرماتے ہیں علمائے دین و مفتیان شرع متین اس مسئلے کے بارے میں     کہ        کیا  ایسی کوئی  حدیث موجود ہے جس میں  بیان کیا گیا ہو کہ شیطان نے  روئے زمین  کی ہر جگہ سجدہ کیا تھا  ، اس بارے  میں رہنمائی فرمادیں ؟

بِسْمِ اللہِ الرَّحْمٰنِ الرَّحِیْمِ

اَلْجَوَابُ بِعَوْنِ الْمَلِکِ الْوَھَّابِ اَللّٰھُمَّ ھِدَایَۃَ الْحَقِّ وَالصَّوَابِ

   کافی تلاش کرنے کے باوجود اس کی کوئی   حدیث  نہیں ملی، البتہ  علمائے کرام کے بعض اقوال اس طرح کے ملتے ہیں کہ شیطان  نے  زمین کے ہر حصے پر اللہ پاک کی عبادت کی  ہے  لیکن تکبر کے سبب مردود  ہوا ۔ اس طرح کی  باتوں کے لیے اتنا حوالہ ہی کافی ہوتا ہے ۔

   تاریخ خمیس میں   علامہ حسين بن محمد بن حسن دِيار بَكْري (متوفى: 966ھ) فرماتے ہیں :” لم يبق فى السموات والارض موضع شبر لم يسجد فيه ابليس“ ترجمہ :زمین و آسمان  میں ایک بالشت برابر بھی  کوئی ایسی جگہ نہ بچی جس پر  ابلیس لعین نے سجدہ نہ کیا ہو ۔  (تاريخ الخميس في أحوال أنفس النفيس، ج 1 ، معاقبة إبليس ، ص51 ، مطبوعہ  دار صادر ،بیروت )

وَاللہُ اَعْلَمُ عَزَّوَجَلَّ وَرَسُوْلُہ اَعْلَم صَلَّی اللّٰہُ تَعَالٰی عَلَیْہِ وَاٰلِہٖ وَسَلَّم