Bilawaja Biwi Aur Bachon Ka Nan o Nafqa Ada Na Karna

بِسْمِ اللہِ الرَّحْمٰنِ الرَّحِيْمِ

اَلْجَوَابُ بِعَوْنِ الْمَلِکِ الْوَھَّابِ اَللّٰھُمَّ ھِدَایَۃَ الْحَقِّ وَالصَّوَابِ

   پوچھی گئی صورت میں مذکورہ  شخص  اپنی بیوی اوربچوں کا نان نفقہ ادا  نہ  کرنے کی وجہ  سے سخت گنا ہ گار ہےکہ صحیح مسلم شریف میں حدیث پاک ہے:رسول اﷲ صلی اﷲ تعالیٰ علیہ وسلم نے فرمايا: کہ”آدمی کو گنہگار ہونے کے ليے اتنا کافی ہے کہ جس کا کھانا اس کے ذمہ ہو، اُسے کھانے کو نہ دے۔“

   اس شخص پر لازم  ہےکہ  اپنے اس گناہ سے توبہ کرے اور اپنے بیوی بچوں  کا نان نفقہ پورا کرے ،اگر وہ کسی بھی طرح   نان نفقہ پورا کرنے پر راضی نہیں  ہے  تو ا س پر لازم ہےکہ اپنی بیوی کو طلا ق دے، یوں معلق نہ چھوڑے ، اوراگر بیوی شوہر کی طرف سے نان نفقہ نہ ملنے کی وجہ سے اس  کےساتھ مزیدزندگی نہیں گزار سکتی تو بیوی  کےلیے بھی  طلاق کا مطالبہ کرنا ، جائز ہے،البتہ طلاق کا مطالبہ کرنے سے پہلے بیوی کو چاہیےکہ اپنے خاندان کے بڑے افرادوالدین وغیرہ سے مشورہ کرلے اور ان کے مشورے کےمطابق عمل کرے ۔

   سیدی اعلیٰ  حضرت رحمۃ اللہ تعالیٰ علیہ نے  فتاویٰ رضویہ  میں ایک  مسئلے کا جواب دیتےہوئے ارشاد فرمایاکہ ’’جب نکاح باقی ہے،تو اس صورت  میں زید پرفرض ہے کہ یا تو اسے طلاق دے دے یا اس کے نان نفقہ کی خبر گیری کرے، ورنہ یو ں معلق رکھنےمیں زید بے شک گنہگار ہےاور صریح حکمِ قرآن کاخلاف کر نے والا۔قرآن پاک میں ہے﴿فَلاَ تَمِیْلُوْا کُلَّ الْمَیْلِ فَتَذَرُوْہَا کَالْمُعَلَّقَۃِ﴾ترجمہ کنز الایمان:’’ تو یہ تو نہ ہو کہ ایک طرف پورا جھک جاؤکہ دوسری کو اَدھرمیں لٹکتی چھوڑ دو۔“        (فتاوی رضویہ ،جلد13،صفحہ435، رضا فاؤنڈیشن، لاھور)

وَاللہُ اَعْلَمُ عَزَّوَجَلَّ وَرَسُوْلُہ اَعْلَم صَلَّی اللّٰہُ تَعَالٰی عَلَیْہِ وَاٰلِہٖ وَسَلَّم