Ruku Aur Sajde Ki Tasbihat Ki Jagah Tasmiya Parhna

رکوع و سجود کی تسبیحات کی جگہ بسم اللہ پڑھنے کاحکم

مجیب:مولانا محمد بلال عطاری مدنی

دارالافتاء اہلسنت

(دعوت اسلامی)

سوال

   رکوع اور سجدے میں تین بار تسبیح پڑھنا سنت ہے،تو  اگر کسی شخص نے تسبیح کی جگہ بسم اللہ پڑھی تو کیا حکم ہوگا؟ کیا بسم اللہ پڑھنا تلاوت میں شمار ہوگا اور نماز مکروہ تحریمی ہوگی؟

بِسْمِ اللہِ الرَّحْمٰنِ الرَّحِیْمِ

اَلْجَوَابُ بِعَوْنِ الْمَلِکِ الْوَھَّابِ اَللّٰھُمَّ ھِدَایَۃَ الْحَقِّ وَالصَّوَابِ

   بسم اللہ  قرآن پاک کی آیت ہے، اس کا پڑھنا بھی قران پڑھنا ہوگا اورنماز میں قیام کے علاوہ رکوع، سجود ، قومہ اور قعود کسی بھی جگہ قرآن پاک پڑھنا مکروہِ تحریمی و ناجائز ہےاوراس سے بچنا واجب ہے ،لہٰذا اگر کسی شخص نے جان بوجھ کر رکو ع  وسجود میں بسم اللہ پڑھی تو نماز واجب الاعادہ ہوگی اور بھولے سے پڑھی تو سجدہ سہو واجب  ہوگا۔

   امام اہلسنت الشاہ امام احمد رضا خان رحمۃ اللہ تعالی علیہ فرماتے ہیں:”قیام کے سوا  رکوع و سجود و قعود کسی جگہ بسم اﷲ پڑھنا جائز نہیں کہ وہ آیۂ قرآنی ہے اور نماز میں قیام کے سوااورجگہ کوئی آیت پڑھنی ممنوع ہے۔“(فتاوی رضویہ،ج  6،ص 350،رضا فاؤنڈیشن،لاھور)

                                                                                    صدر الشریعہ بدر الطریقہ مفتی امجد علی اعظمی رحمۃ اللہ  تعالی علیہ نماز کے مکروہاتِ تحریمہ بیان کرتے ہوئے ارشاد فرماتے ہیں:”قیام کے علاوہ اورکسی موقع پر قرآنِ مجید پڑھنا(مکروہ تحریمی ہے )۔“(بہارِ شریعت ، ج 1 ، حصہ 3 ، ص  629 ، مکتبۃ المدینہ )

   رکوع و سجود میں قرآن پڑھاتو سجدۂ سہو واجب ہے،اس کے متعلق غنیۃ المستملی میں ہے:”لو۔۔۔ قرا القرآن فی رکوعہ او فی سجودہ او فی موضع التشھد یجب علیہ سجود السھو“ترجمہ: اگر کسی نے رکوع، سجود یا تشہد کی جگہ قرآن  پڑھا، تو اس پر سجدۂ سہو واجب ہے۔(غنیۃ المستملی،فصل فی سجود السھو،ص 397،مطبوعہ کوئٹہ)

   بحر الرائق میں ہے” لو قرأ آية في الركوع أو السجود أو القومة فعليه السهو“ترجمہ:اگر کسی نے رکوع، سجود یا قومہ میں کوئی آیت پڑھی ،تو اس پر سجدۂ سہو لازم ہے۔ (بحر الرائق،کتاب الصلاۃ،ج 2،ص 105، دار الكتاب الإسلامي)

وَاللہُ اَعْلَمُ عَزَّوَجَلَّ وَرَسُوْلُہ اَعْلَم صَلَّی اللّٰہُ تَعَالٰی عَلَیْہِ وَاٰلِہٖ وَسَلَّم