Namazi Ke Samne Se Bacha Guzar Jaye Tu Namaz Ka Kya Hukum Hai

   میرا سوال یہ ہے  کہ اگر عورت گھر میں اکیلی ہے اور بچوں کو سنبھالنے والا کوئی نہیں تو اگر وہ نماز ادا کر رہی ہے اور بچے بار بار سامنے سے گزر رہے ہیں تو اس نماز کا کیا حکم ہے،کیا نماز ہو جائے گی یا ٹوٹ جائے گی؟

بِسْمِ اللہِ الرَّحْمٰنِ الرَّحِيْمِ

اَلْجَوَابُ بِعَوْنِ الْمَلِکِ الْوَھَّابِ اَللّٰھُمَّ ھِدَایَۃَ الْحَقِّ وَالصَّوَابِ

   نماز پڑھتے ہوئے نمازی کے آگے سےمرد،عورت،بچہ یاجانور وغیرہ گزر جائے تو اس سے نماز میں کوئی فرق  نہیں پڑتا، اگر چہ نمازی کے سامنے سے عاقل بالغ شخص کاجان بوجھ کرگزرنا ،ناجائز ہے۔البتہ! نماز پڑھنے کے بعد بچوں کو پیار و محبت سے سمجھایا جائے کہ وہ نمازی کے آگے سے نہ گزراکریں۔

   نمازی کے سامنے سے گزرنے کے متعلق مؤطاامام مالک میں ہے”أنّ کعب الأحبار قال :” لو یعلم المارّ بین یدی المصلی ماذا علیہ لکان أن یخسف بہ خیراً لہ من أن یمّر بین یدیہ“  ترجمہ: کعب احبار رحمۃ اللہ علیہ  نے ارشاد فرمایا کہ  نمازی کے سامنے  سے گزرنے والا اگر جانتا کہ اس پر کیا گناہ ہے تووہ  زمین میں دھنس جانے کو گزرنے سے بہتر جانتا۔(مؤطا مالک،رقم الحدیث 527،ج 2،ص 216،مطبوعہ :الإمارات)

   تنویرالابصارودرمختارمیں ہے"(ولایفسدھا۔۔۔مرورمار۔۔۔مطلقا)ولوامراۃ اوکلبا"ترجمہ:گزرنے والاکوئی ہی ہو،خواہ عورت ہویاکتا،اس کانمازی کے سامنے سے گزرنااس کی نمازکافاسدنہیں کرتا۔(الدرالمختارمع ردالمحتار،کتاب الصلاۃ،ج02،ص479،480،مطبوعہ:کوئٹہ)

   بہار شریعت میں صدر الشریعہ مفتی امجد علی  اعظمی رحمۃ اللہ علیہ ارشاد  فرماتے ہیں :” نمازی کے آگے سے بلکہ موضع سجود  سے کسی کا گزرنا نماز کو فاسد نہیں کرتا، خواہ گزرنے والا مرد ہو یا عورت،  کتّاہو یا گدھا۔“(بہار شریعت،ج 1،حصہ 03،ص614،مکتبۃ المدینہ،کراچی)

وَاللہُ اَعْلَمُ عَزَّوَجَلَّ وَرَسُوْلُہ اَعْلَم صَلَّی اللّٰہُ تَعَالٰی عَلَیْہِ وَاٰلِہٖ وَسَلَّم