Namazi Cheenk Aane Par Hamd Kahe To Namaz Ka Kya Hukum Hai?

   کیا فرماتے ہیں علمائے کرام اس مسئلہ کے بارے میں کہ نمازی کو چھینک آئے اور وہ یہ جانتے ہوئے کہ نماز میں ہے الحمد للہ کہہ دے، تو اس صورت میں نماز کا کیا حکم ہوگا؟

بِسْمِ اللہِ الرَّحْمٰنِ الرَّحِيْمِ

اَلْجَوَابُ بِعَوْنِ الْمَلِکِ الْوَھَّابِ اَللّٰھُمَّ ھِدَایَۃَ الْحَقِّ وَالصَّوَابِ

   مسئلہ کی تفصیل یہ ہے کہ اگر نماز میں چھینک آجائے تو نمازی کو چاہیے کہ وہ  نماز سے فارغ ہونے کے بعد حمد کہے۔ البتہ اگر کسی نمازی نے نماز ہی میں حمد کہہ لی تب بھی فقہائے کرام کی تصریحات کے مطابق اس کی نماز فاسد نہیں ہوگی کہ چھینک آنے پر حمد کہنا عرفاً جواب نہیں لھذا مفسد نماز ہونے کا سبب نہیں پایا گیا۔

   چنانچہ فتاوی عالمگیری، فتاوٰی شامی وغیرہ کتبِ فقہیہ میں مذکور ہے:”والنظم للاول“ لو قال العاطس لا تفسد صلاته وينبغی ان يقول فی نفسه والاحسن هو السكوت كذا فی الخلاصة “یعنی نمازی کو چھینک آئی اور اس نےالحمد للہ کہا تو نماز نہیں ٹوٹے گی اورنمازی کو چھینک آنے پرالحمدللہ دل میں کہنا چاہئےاورخاموشی اختیار کرنا اچھا ہے جیسا کہ خلاصہ میں ہے ۔ (الفتاوی الھندیۃ، کتاب الصلاۃ، ج01،ص98،مطبوعہ پشاور)

   درر غررمیں ہے:”لو قال العاطس او السامع الحمد للہ لا تفسد لانه ليس جوابا عرفا “یعنی اگر چھینکنے والے نےیا سامع نےالحمد للہ کہا تو نماز فاسد نہیں ہوگی کیونکہ یہ عرفاً جواب نہیں۔(درر الحکام شرح غرر الاحکام،ج01،ص102،مطبوعہ کراچی)

   بہارِ شریعت میں ہے:”نماز میں چھینک آئے توسکوت کرےاور الحمدللہ کہہ لیا تو بھی نماز میں حرج نہیں اور اگر اس وقت حمد نہ کی تو فارغ ہوکر کہے۔“(بہار شریعت،ج01، ص605، مکتبۃ المدینہ، کراچی)

وَاللہُ اَعْلَمُ عَزَّوَجَلَّ وَرَسُوْلُہ اَعْلَم صَلَّی اللّٰہُ تَعَالٰی عَلَیْہِ وَاٰلِہٖ وَسَلَّم