Makrooh Waqt Khatam Hote Hi Chasht Ki Namaz Parhne Ka Hukum

   کیا فرماتے ہیں علمائے کرام اس مسئلہ کے بارے میں کہ کیا سورج نکلنے کے  بعد وقت جو مکروہ وقت ہوتا ہے،یہ  ختم ہوتے ہی چاشت کی نماز پڑھ سکتے ہیں؟ اور  نماز چاشت کا افضل وقت کیا ہے؟

بِسْمِ اللہِ الرَّحْمٰنِ الرَّحِيْمِ

اَلْجَوَابُ بِعَوْنِ الْمَلِکِ الْوَھَّابِ اَللّٰھُمَّ ھِدَایَۃَ الْحَقِّ وَالصَّوَابِ

   جی ہاں!مکروہ وقت ختم ہونے کے بعد چاشت کی نمازپڑھنا درست ہےکہ چاشت کی نماز کا وقت مکروہ وقت ختم ہوتے ہی شروع ہوجاتا ہے  اور ضحوی کبری یعنی نصف النہار شرعی تک رہتا ہے،البتہ چاشت کی نمازادا کرنے  کا مختار و افضل وقت یہ ہے کہ چوتھائی دن گزرنے کے بعد پڑھے ۔

   فتاوی ہندیہ میں ہے:”ومن المندوبات صلاۃ الضحی  واقلھا رکعتان اواکثرھا ثنتا عشرۃ رکعۃ ووقتھا من ارتفاع الشمس الی زوالھا“یعنی مستحب نمازوں میں سے چاشت کی نماز بھی ہے اور اس کی کم از کم دو رکعتیں  اور زیادہ سے زیادہ  بارہ رکعتیں ہیں  اور اس کا  وقت آفتاب بلند ہونے سے لے کر زوال سے پہلے تک ہے۔(فتاوی ھندیہ، جلد1،صفحہ 112،مطبوعہ:پشاور)

   در مختار و حاشیۃ طحطاوی میں ہے:واللفظ فی الھلالین للدر:”(وقتھا المختار )ای الافضل (بعد ربع النھار)“یعنی چاشت کی نماز کا مختار یعنی افضل وقت چوتھائی دن کے بعد کا وقت ہے۔(حاشیۃ الطحطاوی علی الدر المختار، جلد1، صفحہ 287، مطبوعہ:کوئٹہ)

   چاشت کی نماز کا وقت بیان کرتے ہوئے صدر الشریعہ مفتی امجد علی اعظمی رحمۃ اللہ علیہ فرماتے ہیں:”اس کا وقت آفتاب بلند ہونے سے زوال یعنی نصف النہار شرعی تک ہے اور بہتر یہ ہے کہ چوتھائی دن چڑھے پڑھے۔“(بہارِ شریعت، جلد1،صفحہ 676،مکتبۃ المدینہ، کراچی)

وَاللہُ اَعْلَمُ عَزَّوَجَلَّ وَرَسُوْلُہ اَعْلَم صَلَّی اللّٰہُ تَعَالٰی عَلَیْہِ وَاٰلِہٖ وَسَلَّم