Bhool Kar 2 Martaba Sajda Sahw Karne Ka Hukum

بھول کر دو مرتبہ سجدہ سہو کرنے کا حکم

دارالافتاء اہلسنت

(دعوت اسلامی)

سوال

   جو سجدہ سہو کر کےالتحیات پڑھنا شروع کر دےاور بھول جائے کہ اس نے سجدہ سہو کر لیا ہے،اس لیے دوبارہ سجدہ سہو کر لےاور پھر بعد میں یاد آئے کہ وہ تو سجدہ سہو کر چکا تھا،تو ایسی صورت میں کیا حکم شرعی ہو گا؟

بِسْمِ اللہِ الرَّحْمٰنِ الرَّحِیْمِ

اَلْجَوَابُ بِعَوْنِ الْمَلِکِ الْوَھَّابِ اَللّٰھُمَّ ھِدَایَۃَ الْحَقِّ وَالصَّوَابِ

   مذکورہ صورت میں بھولے سے دوبارہ سجدہ سہو کرنے سے نمازپرکوئی فرق نہیں پڑاکہ یہ جواس نے دوبارہ سجدہ سہوکرنے کے لیے سلام پھیراہے ،یہ درحقیقت خروج بصنعہ والاسلام ہے  ۔ہاں اگر یہ امام ہے ،تو جو مقتدی مسبوق تھا یعنی بعض رکعات اس نے نہیں پائی تھیں، وہ اگر اس  زائدسجدے میں اس کا شریک ہو ا تو اس کی نماز جاتی رہی،وہ اپنی نمازکودوبارہ اداکرے گا۔

   اعلیٰ حضرت امام اہلسنت مولانا شاہ امام احمد رضا خان علیہ رحمۃالرحمن  سے سوال ہوا کہ :" جس نماز میں سہو نہ ہوا اور سجدہ سہو کیا تو نماز جائز ہے یا نہیں؟"

   اس پر  آپ  علیہ الرحمۃ نے ارشاد فرمایا:”بے حاجت سجدہ سہو نماز میں زیادت اور ممنوع ہے مگر نماز ہوجائے گی۔ ہاں اگر یہ امام ہے تو جو مقتدی مسبوق تھا یعنی بعض رکعات اس نے نہیں پائی تھیں وہ اگر اس سجدہ بے حاجت میں اس کا شریک ہو ا تو اس کی نماز جاتی رہے گی "لانہ اقتدی فی محل الانفراد  "(کیونکہ اس نے محلِ انفراد میں اس کی اقتدا کی)“(فتاوی رضویہ،جلد 6،صفحہ327-328، رضا فاؤنڈیشن لاہور)

وَاللہُ اَعْلَمُ عَزَّوَجَلَّ وَرَسُوْلُہ اَعْلَم صَلَّی اللّٰہُ تَعَالٰی عَلَیْہِ وَاٰلِہٖ وَسَلَّم