Parindon Ki Kharid o Farokht Ka Hukum

پرندوں کی خرید و فروخت کا حکم

دارالافتاء اہلسنت

(دعوت اسلامی)

سوال

   کیا فرماتے ہیں علمائے دین و مفتیان ِ شرع متین اس مسئلے میں کہ  کیا شریعت میں پرندوں کی خریدو فروخت ناجائز ہے؟

بِسْمِ اللہِ الرَّحْمٰنِ الرَّحِیْمِ

اَلْجَوَابُ بِعَوْنِ الْمَلِکِ الْوَھَّابِ اَللّٰھُمَّ ھِدَایَۃَ الْحَقِّ وَالصَّوَابِ

   پرندوں کی خریدو فروخت شرعاً جائز ہے،اس میں حرج نہیں ۔البتہ!یہ یادرہے کہ پرندوں کے دانے پانی اورآرام وغیرہ  کاخوب  خیال رکھاجائے،ان کوتکلیف پہنچانے سے بازرہے کہ جانورپرظلم،ذمی پرظلم سے سخت ترہے اورذمی پرظلم،مسلمان پرظلم سےسخت ترہے ۔

   در مختار میں ہے”(وصح بیع الکلب)۔۔۔حتی الھرۃ وکذا الطیور“ ترجمہ:کتے۔۔۔  بلی کی خریدوفروخت درست ہے اسی طرح پرندوں کی بھی۔‘‘ (در مختار مع رد المحتار،کتاب البیوع،ج 5،ص 226،227،دار الفکر،بیروت)

   تبیین الحقائق میں ہے:” من الطيور يجوز بيعه“ ترجمہ: پرندوں کی بیع جائز ہے۔  (تبیین الحقائق،ج 4،ص 126،مطبوعہ قاھرۃ)

   ایک حدیث میں حکم ہے کہ جوجانور پالو  دن میں ستربار اُسے دانہ پانی دکھاؤ نہ کہ گھنٹوں  پہروں بھوکا پیاسا رکھو اورنیچے آناچاہے تو آنےنہ دو۔علماء فرماتے ہیں جانورپرظلم کافرذمی پرظلم سے سخت ترہے اورکافر ذمی پرمسلمان ظلم سے اشد کما فی الدرالمختاروغیرہ  (جیساکہ درمختاروغیرہ میں ہے۔) (فتاوی رضویہ ،ج16،ص656،رضافاؤنڈیشن،لاہور)

وَاللہُ اَعْلَمُ عَزَّوَجَلَّ وَرَسُوْلُہ اَعْلَم صَلَّی اللّٰہُ تَعَالٰی عَلَیْہِ وَاٰلِہٖ وَسَلَّم