Umrah Mein Lazim Hone Wala Dam Ada Na Kiya Aur Watan Wapas Aa Gaye Tu Kya Hukum Hai ?

عمرہ میں لازم ہونے والا دم ادا نہ کیا اور وطن واپس آگئے تو کیا حکم ہے ؟

مجیب: ابو الحسن جمیل احمد غوری العطاری

فتوی نمبر:Web-794

تاریخ اجراء:11جماد  ی الاوّل1444 ھ  /06دسمبر2022 ء

دارالافتاء اہلسنت

(دعوت اسلامی)

سوال

   عمرہ میں لازم ہونے والا دم اگر ادا نہیں کیا اور پاکستان واپس آگئے، تو  اب کیا حکم ہو گا اور اگر کوئی دم ادا ہی نہ کرے، تو اس پر کیا حکم ہو گا؟

بِسْمِ اللہِ الرَّحْمٰنِ الرَّحِیْمِ

اَلْجَوَابُ بِعَوْنِ الْمَلِکِ الْوَھَّابِ اَللّٰھُمَّ ھِدَایَۃَ الْحَقِّ وَالصَّوَابِ

   عمرے میں دَم واجب ہونے سے مراد کسی جنایت کی وجہ سے بکرے، بکری یا بھیڑ وغیرہ کی قربانی  واجب ہونا ہے۔ اگر کسی پر دَم واجب ہوا  تو اس  پر دَم کی ادائیگی واجب ہوگی،ہاں فوری ادائیگی واجب نہیں بلکہ تاخیر کرنا بھی جائز  ہے البتہ بہتر یہ ہے کہ فوراً ادا کر دے،اور اگر ایسی حالت ہوجائے کہ زندہ رہنےکی امید نہ رہے تو اب فوری ادا کردے کہ اگر بلا عذر شرعی ادا کیے بغیر مر گیا تو گناہگار ہوگا لہٰذا ادا کردے یا ورثاء کو اپنی طرف سے دَم ادا کرنے کی وصیت کرجائے اور اگر اس نے وصیت نہیں کی تو ورثاء اپنی طرف سے بھی اس پر لازم آنے والا دَم ادا کر سکتے ہیں نیز  کفارے کی قربانی حرم ہی میں کی جاسکتی ہے،پاکستان وغیرہ ،غیر حرم میں نہیں ہوسکتی۔اگر اب حرم میں خود جاکر ادا نہیں کرسکتا تو کسی کو رقم دے کر حرم میں دَم ادا کرنے کے لیے وکیل کردے اور وہ شخص حرم میں اس کی طرف سے دَم ادا کردے۔(فتاوی حج و عمرہ، حصہ 1 ،صفحہ 116) (ارشاد الساری الی مناسک علی القاری،صفحہ 423،بیروت)

وَاللہُ اَعْلَمُ عَزَّوَجَلَّ وَرَسُوْلُہ اَعْلَم صَلَّی اللّٰہُ تَعَالٰی عَلَیْہِ وَاٰلِہٖ وَسَلَّم