Aroush Naam Rakhna Kaisa Hai?

عروش نام رکھنا کیسا؟

دارالافتاء اہلسنت

(دعوت اسلامی)

سوال

   بچی کا نام عروش رکھنا کیسا؟

بِسْمِ اللہِ الرَّحْمٰنِ الرَّحِیْمِ

اَلْجَوَابُ بِعَوْنِ الْمَلِکِ الْوَھَّابِ اَللّٰھُمَّ ھِدَایَۃَ الْحَقِّ وَالصَّوَابِ

   عروش عربی زبان کا لفظ ہے، اور یہ عرش کی جمع ہے، اردو اور فارسی میں بھی استعمال ہوتا ہے، اس کے معنی ہیں:کئی چھتیں،کئی تخت اورکئی آسمان وغیرہ۔ معنی کے اعتبار سے یہ نام رکھنا تو درست ہے ، البتہ! بہتریہ ہے کہ بچی کا نام نبی پاک صلی اللہ تعالیٰ علیہ وسلم کی ازواج مطہرات،بیٹیوں، صحابیات  رضی اللہ عنہن اور نیک خواتین کے نام پر رکھا جائےکہ حدیث پاک میں اچھے لوگوں کے نام پرنام رکھنے کی ترغیب ارشادفرمائی گئی ہے، نیزامیدہے کہ اچھے نام کی برکت اور ان بزرگ ہستیوں کی برکت بھی بچی کےشامل حال ہو گی۔

   الغریبین فی القرآن والحدیث میں ہے” وللعرش هنا معنيان: أحدهما: السرير والأسرة للملوك ۔۔۔ والمعنى الآخر: البيت ينصب من العيدان ويظلل. وجمعه: عروش“ترجمہ:عرش کے دو معانی ہیں : (1)چارپائی ، بادشاہوں کا تخت،(2)لکڑی کا خیمہ جس سے سایہ لیا جاتا ہے،اور عرش کی جمع عروش ہے۔ (الغریبین فی القرآن والحدیث،ج 1،ص 292،مطبوعۃ  المملكة العربية السعودية)

   القاموس الوحید میں ہے”العرش:ملک،بادشاہت،تختِ شاہی،چھت۔۔الخ،ج عروش۔(القاموس الوحید،ص 1065،ادارہ اسلامیات،لاہور)

   الفردوس بماثور الخطاب میں ہے:”تسموا بخياركم “ ترجمہ: اچھوں کے نام پر نام رکھو ۔(الفردوس بماثور الخطاب، جلد2، صفحہ58، حدیث2329، دار الكتب العلمية ، بيروت)

   صدر الشریعہ مفتی محمد امجد علی اعظمی رحمۃ اللہ علیہ فرماتے ہیں : ”بچہ کا اچھا نام رکھا جائے۔ ہندوستان میں بہت لوگوں کے ایسے نام ہیں ، جن کے کچھ معنی نہیں یا اون کے برے معنی ہیں ، ایسے ناموں سے احتراز کریں۔ انبیائے کرام علیہم الصلاۃ والسلام کے اسمائے طیبہ اور صحابہ و تابعین و بزرگان دِین کے نام پر نام رکھنا بہتر ہے ، امید ہے کہ اون کی برکت بچہ کے شاملِ حال ہو۔“ (بہار شریعت ، جلد3،حصہ 15، صفحہ356، مکتبۃ المدینہ، کراچی)

   نوٹ : ناموں کے بارے میں تفصیلی معلومات حاصل کرنے کے لیے دعوتِ اسلامی کے مکتبۃ المدینہ کی کتاب ”نام رکھنے کے احکام“ پڑھیں ۔ اس میں بچوں اور بچیوں کے بہت سے اسلامی نام بھی لکھے ہوئے ہیں ،وہاں سے دیکھ کر کوئی سا بھی اچھا نام رکھا جا سکتا ہے ۔ نیچے دئے گئے لنک سے یہ کتاب ڈاؤن لوڈ بھی کی جا سکتی ہے ۔

https://www.dawateislami.net/bookslibrary/ur/naam-rakhnay-kay-ahkam

وَاللہُ اَعْلَمُ عَزَّوَجَلَّ وَرَسُوْلُہ اَعْلَم صَلَّی اللّٰہُ تَعَالٰی عَلَیْہِ وَاٰلِہٖ وَسَلَّم