Auraton Ka Chadar Kandho Par Latka Kar Namaz Parhna

اَلْجَوَابُ بِعَوْنِ الْمَلِکِ الْوَھَّابِ اَللّٰھُمَّ ھِدَایَۃَ الْحَقِّ وَالصَّوَابِ

   سر پر اس طرح چادر  ڈالنا  کہ وہ ،گردن یا جسم کے گرد لپٹی ہوئی نہ ہو ، اس کے دونوں پلو آگے کی جانب لٹک رہے ہوں ، یا ایک پلو آگے کی جانب اور دوسرا پیچھے کی جانب ہو یہ سدل کہلاتا ہے ہے  اور  نماز میں سدل مکروہ ِ تحریمی  ہے  یعنی  اس حالت میں نماز   پڑھ لی تو اس کا  لوٹانا واجب ہے،  اب اگر یاد  نہیں ہے  کہ کتنی نمازیں اس طرح پڑھی ہیں؟  تو  جتنی نمازوں سے متعلق غالب گمان ہے اتنی نمازوں کا اعادہ ( لوٹانا)  واجب  ہے  ۔

   امام اہلسنت امام احمد رضا خان رحمۃ اللہ علیہ سدل کی  مختلف صورتیں بیان کرتے ہوئے فرماتے ہیں :’’اصل یہ ہے کہ سدل یعنی پہننے کے کپڑے کو بے پہنے لٹکانا، مکروہ تحریمی ہے اور اس سے نمازواجب الاعادہ جیسے انگرکھا یا کرتا کندھوں پرسے ڈال لینابغیر آستینوں میں ہاتھ ڈالے یا بعض بارانیاں  وغیرہ ایسی بنتی ہیں کہ اُن کی آستینوں میں مونڈھوں کے پاس ہاتھ نکال لینے کے چاک بنے ہوتے ہیں ان میں سے ہاتھ نکال کر آستینوں کو بے پہنے چھوڑ دینا یا رضائی یا چادر کندھے یا سر پر ڈال کردونوں آنچل چھوڑ دینا یا شال یا رومال ایک شانہ پر اس طرح ڈالنا کہ اس کے دونوں پلّو آگے پیچھے چھوٹے رہیں۔ ‘‘)فتاوی رضویہ ،جلد7،صفحہ385،رضا فاؤنڈیشن ، لاھور(

وَاللہُ اَعْلَمُ عَزَّوَجَلَّ وَرَسُوْلُہ اَعْلَم صَلَّی اللّٰہُ تَعَالٰی عَلَیْہِ وَاٰلِہٖ وَسَلَّم