Ghous e Pak Ki Bayan Ki Jane Wali Karamaat Sachi Hain Ya Jhooti Kaise Maloom Ho

   مفتی صاحب آج کل حضور غوث پاک رحمتہ اللہ علیہ کی بہت سی کرامات بیان کی جا تی ہیں،تو ہمیں کیسے پتہ چلے کہ یہ کرامت سچی ہے یا  جھوٹی ومن گھڑت ہے ؟ جیسے غوث پاک کے دھوبی والا واقعہ بھی بیان کیا جاتا ہے؟

بِسْمِ اللہِ الرَّحْمٰنِ الرَّحِيْمِ

اَلْجَوَابُ بِعَوْنِ الْمَلِکِ الْوَھَّابِ اَللّٰھُمَّ ھِدَایَۃَ الْحَقِّ وَالصَّوَابِ

   حضور غوث پاک رحمۃ اللہ  تعالیٰ علیہ کی طرف منسوب کرامات اگر کسی مستند و معتبر کتاب میں موجود ہو،  تو  اسے سچا مانا جائے گا اور اسے آگے بیان کرنابھی درست ہوگا۔ جیسے غوث پاک کی سیرت پر لکھی گئی ایک کتاب ”بھجۃ الاسرار “ ہے، اس میں موجود کرامات بیان کی جاسکتی ہیں۔

   نیز غوث پاک کا دھوبی والا واقعہ کہ جس میں آپ کے دھوبی نے  قبر میں فرشتوں کے  سولات کے جواب میں کہا کہ میں غوث پاک کا دھوبی ہوں، یہ واقعہ کسی مستند کتاب میں موجود نہیں، بلکہ علماء نے اسے بے اصل قرار دیا ہے، لہٰذا اسے بیان کرنادرست نہیں ہے۔

   مفتی جلال الدین احمد امجدی رحمۃ اللہ علیہ مذکورہ واقعہ کے متعلق ایک سوال کے جواب میں فرماتے ہیں:”روایت مذکورہ بے اصل ہے۔ اس کا بیان کرنا درست نہیں۔ لہٰذا جس نے اسے بیان کیا وہ اس سے رجوع کرے اور آئندہ اس روایت کے نہ بیان کرنے کا عہد کرے۔ اگر وہ ایسا نہ کرے تو کسی معتمد کتاب سے اس روایت کو ثابت کرے۔“(ماخوذ از فتاویٰ فقیہ ملت جلد:2، صفحہ:411، شبیر برادرز، لاھور)

وَاللہُ اَعْلَمُ عَزَّوَجَلَّ وَرَسُوْلُہ اَعْلَم صَلَّی اللّٰہُ تَعَالٰی عَلَیْہِ وَاٰلِہٖ وَسَلَّم